रुसी आणविक पनडुब्बी ‘कजान’द्वारा ३०० किलोमिटर टाढाको लक्ष्यमा सफल प्रहार

काठमाडौं । रुसको नर्दर्न फ्लीटले बिहीबार दिएको जानकारीअनुसार आणविक शक्ति सञ्चालित पनडुब्बी ‘कजान’ले एक योजनाबद्ध युद्ध प्रशिक्षण अभ्यासका क्रममा ‘ओनिक्स’ क्रुज मिसाइल प्रयोग गरी ३०० किलोमिटरको दूरीमा रहेको सतहको लक्ष्यमा सफल प्रहार गरेको छ ।

फ्लीटको प्रेस सेवाले आफ्नो वेबसाइटमा जारी गरेको विज्ञप्तिमा कजानले पानीमुनिको स्थितिबाट ३०० किलोमिटर टाढा रहेको दुश्मनको जहाजलाई संकेत गर्ने समुद्री लक्ष्यमा ओनिक्स क्रुज मिसाइल प्रहार गरेको उल्लेख गरेको छ ।

वस्तुगत अनुगमनबाट मिसाइलको वारहेडले सफलतापूर्वक समुद्री लक्ष्यमा प्रहार गरेको पुष्टि भएको फ्लीटले थप जानकारी दिएको छ । उक्त मिसाइल प्रक्षेपण बेरेन्ट्स सागरबाट गरिएको थियो ।

अभ्यास क्षेत्रको सुरक्षा सुनिश्चित गर्न र फायरिङ अपरेसनमा सहयोग पुर्याउन फ्लीटका सतहमा चल्ने जहाजहरू र नौसेना उड्डयन इकाइहरू संलग्न थिए । ‘कजान’ चौथो पुस्ताको आणविक शक्ति सञ्चालित पनडुब्बीको एक परिमार्जित संस्करण हो । जसलाई कम ध्वनि उत्सर्जन गर्ने गरी डिजाइन गरिएको छ । यी पनडुब्बीहरू जमिन, समुद्र र पानीमुनि रहेका लक्ष्यहरूमा सटीक प्रहार गर्न सक्षम लामो दूरीका अत्याधुनिक क्षेप्यास्त्र हतियारहरूले सुसज्जित छन् ।

पनडुब्बी कजानको निर्माण सन् २००९ मा रुसी शहर सेभेरोडविन्स्कस्थित सेभमाश शिपयार्डमा सुरु गरिएको थियो र सन् २०२१ मा यसलाई औपचारिक रूपमा रुसी नौसेनामा समावेश गरिएको थियो ।