रामेछापमा चुनावी सामग्री बोकेको गाडी दुर्घटना, मृत्यु हुनेको संख्या दुई पुग्यो

काठमाडौं । रामेछापमा मतदान सामग्री र निर्वाचन कर्मचारी बोकेको गाडी दुर्घटनामा परी मृत्यु हुनेको संख्या दुई पुगेको छ ।

जिल्ला प्रहरी कार्यालय रामेछापका अनुसार दुर्घटनामा घाइते भएका मतदान अधिकृत डोरप्रसाद घिमिरेको मन्थली अस्पतालमा उपचारका क्रममा मृत्यु भएको हो । यसअघि दुर्घटनामा असई पर्शुराम यादवको ज्यान गएको प्रहरीले जनाएको छ ।

दुर्घटनामा घाइते अन्य सात जनाको काठमाडौंस्थित छाउनी अस्पताल मा उपचार भइरहेको छ ।

रामेछाप नगरपालिका–२ देउरालीतर्फ जाँदै गरेको ना ७ ख ६७६८ नम्बरको गाडी सोमबार साँझ दुर्घटनामा परेको थियो । प्रहरीले दुर्घटनाको कारणबारे थप अनुसन्धान गरिरहेको जनाएको छ ।