एजेन्सी — पाकिस्तानमा आइतबार भएको अमेरिका–विरोधी प्रदर्शनका क्रममा २० जनाको मृत्यु भएको छ भने १ सयभन्दा बढी घाइते भएका छन्।
कराचीमा प्रदर्शनकारीहरूले अमेरिकी वाणिज्य दूतावास बाहिर प्रहरीसँग झडप गरेका थिए। प्रदर्शनकारीहरू दूतावास परिसरभित्र प्रवेश गर्न खोजेपछि सुरक्षा बलले कारबाही गरेको रेस्क्यु ११२२ सिन्धले जनाएको छ। घाइतेहरूलाई नजिकैका अस्पतालमा उपचारका लागि भर्ना गरिएको छ, जसमध्ये धेरैको अवस्था गम्भीर रहेको प्रवक्ता हसन उल हसीवले बताएका छन्।
इस्लामाबादस्थित अमेरिकी दूतावासले विज्ञप्ति जारी गर्दै कराची र लाहोरका वाणिज्य दूतावासहरू, इस्लामाबादस्थित दूतावास तथा पेशावरस्थित वाणिज्य दूतावासमा सम्भावित प्रदर्शनहरूको निगरानी भइरहेको जनाएको छ। पाकिस्तानमा रहेका अमेरिकी नागरिकहरूलाई स्थानीय समाचारको अनुगमन गर्न, भीडभाडबाट टाढा रहन र आफ्नो सुरक्षा सतर्कता बढाउन सल्लाह दिइएको छ।
यी प्रदर्शनहरू आयतोल्लाह अली खामेनीको हत्या पछिको प्रतिक्रियाका रूपमा भएका बताइएको छ। गत शनिबार अमेरिका–इजरायलको संयुक्त हवाई आक्रमणमा तेहरानमा खामेनीको हत्या भएको दाबी गरिएको छ।
लाहोरमा सयौं कार्यकर्ता अमेरिकी वाणिज्य दूतावास बाहिर जम्मा भएका छन् भने प्रहरीले सुरक्षा व्यवस्था कडा पारेको छ। इस्लामाबादमा अधिकारीहरूले सेक्शन १४४ लागू गर्दै सबै प्रकारका भेलामा प्रतिबन्ध लगाएका छन्। उल्लङ्घनकर्तामाथि कडा कानुनी कारबाही गरिने चेतावनी पनि दिइएको छ।
फेसबुकबाट तपाईको प्रतिक्रिया