बंगलादेश संसदीय निर्वाचनमा बंगलादेश नेशनलिस्ट पार्टी को अग्रता

एजेन्सी । बंगलादेशको १३औँ संसदीय निर्वाचनको बिहीबार भएको मतदानको प्रारम्भिक मतपरिणामअनुसार तारिक रहमान नेतृत्वको बीएनपी स्पष्ट अग्रतामा रहेको छ।

औपचारिक नतिजा भने बंगलादेश निर्वाचन आयोग ले शुक्रबार रातिसम्म सार्वजनिक गर्ने अपेक्षा गरिएको अल जजिरा ले जनाएको छ। देशभर करिब ६१ प्रतिशत मतदान भएको आयोगले बताएको छ।

यसपटकको चुनाव सन् २०२४ को विद्यार्थी आन्दोलनपछि पहिलो पटक भएको हो, जसले पूर्वप्रधानमन्त्री शेख हसिना लाई सत्ताबाट हटाएको थियो। उहाँको दल अवामी लिग प्रतिबन्धित भएपछि यस चुनावमा बीएनपी र जमात–ए–इस्लामी बीच मुख्य प्रतिस्पर्धा भएको हो।

अनौपचारिक विवरणअनुसार बीएनपी ३ सय सदस्यीय संसदमा बहुमत नजिक पुगेको बताइए पनि औपचारिक सिट संख्या आउन बाँकी रहेको छ। पार्टी नेताहरूले समर्थकलाई उत्सव र्याली नगर्न र संयमित रहन आग्रह गरेका छन्। तारिक रहमानले शान्तिपूर्ण वातावरण कायम राख्न विशेष प्रार्थना गर्न निर्देशन दिएका छन्। जमात–ए–इस्लामी नेतृत्वले पनि ठूलो हस्तक्षेप नभए परिणाम स्वीकार गर्ने बताएका छन्।

चुनावसँगै ‘जुलाई बडापत्र २०२५’ सम्बन्धी जनमतसंग्रह पनि सम्पन्न भएको छ। प्रारम्भिक मतगणनाअनुसार करिब ७२ प्रतिशत मतदाता संवैधानिक सुधार प्रस्तावको पक्षमा देखिएका छन्। प्रस्तावमा प्रधानमन्त्रीका लागि कार्यकाल सीमा, राष्ट्रपतिको अधिकार विस्तार र चुनाव प्रणाली सुधारजस्ता विषय समेटिएका छन्।

मतदानका क्रममा केही स्थानमा झडप समेत भएका थिए। खुलना मा जमात–ए–इस्लामी कार्यकर्तासँगको झडपमा बीएनपी नेता मोहिबुज्जमान कोची को मृत्यु भएको छ। त्यस्तै मुन्सीगञ्ज र गोपालगञ्ज मा भएको झडपमा तीन जना घाइते भएका अन्तर्राष्ट्रिय सञ्चार माध्यमले जनाएका छन्।

औपचारिक नतिजापछि नयाँ सरकार गठन प्रक्रिया अघि बढ्ने अपेक्षा गरिएको छ।