सरकारले आव २०८१/०८२ को वार्षिक प्रतिवेदन राष्ट्रपति समक्ष पेश गर्ने

काठमाडौँ । सरकारले आर्थिक वर्ष २०८१/०८२ को वार्षिक प्रतिवेदन राष्ट्रपति समक्ष पेश गर्ने निर्णय गरेको छ।

सोमबार सिंहदरबारमा बसेको मन्त्रिपरिषद् बैठकले उक्त प्रतिवेदन राष्ट्रपति रामचन्द्र पौडेलसमक्ष पेश गर्ने निर्णय गरेको हो। नेपाल सरकारका प्रवक्ता तथा गृहमन्त्री ओमप्रकाश अर्यालले संवैधानिक व्यवस्थाअनुसार प्रत्येक वर्ष सरकारको वार्षिक प्रतिवेदन राष्ट्रपतिसमक्ष पेश गर्नुपर्ने भएकाले सो निर्णय गरिएको जानकारी दिनुभयो।

उहाँका अनुसार मन्त्रिपरिषद् बैठकले राष्ट्रिय आर्थिक गणना २०८२ का लागि तथ्यांक संकलन गर्ने आदेश पनि स्वीकृत गरेको छ। गृहमन्त्री अर्यालले बैठकका निर्णय सार्वजनिक गर्दै सरकारको वार्षिक प्रतिवेदन राष्ट्रपतिसमक्ष पेश गर्ने तथा आर्थिक गणनासम्बन्धी तयारी अघि बढाउने निर्णय भएको बताउनुभयो।

संवैधानिक प्रावधानअनुसार सरकारले आफ्नो वार्षिक कार्यसम्पादन, नीतिगत प्रगति र आर्थिक अवस्थाबारेको प्रतिवेदन हरेक वर्ष राष्ट्रपतिसमक्ष पेश गर्दै आएको छ।