जापान र थाइल्याण्डका चुनावले राजनीतिक दिशा बदल्ने संकेत

एजेन्सी । जापान र थाइल्याण्डमा हालै सम्पन्न आम चुनावले दुवै देशको राजनीतिक दिशामा महत्वपूर्ण परिवर्तनको संकेत दिएको छ।

जापानमा प्रधानमन्त्री सानाए ताकाइची नेतृत्वको लिबरल डेमोक्रेटिक पार्टी (एलडिपी) नेतृत्वको गठबन्धनले स्पष्ट बहुमत हासिल गरेको अन्तर्राष्ट्रिय सञ्चारमाध्यमहरूले जनाएका छन्। यस जितले ताकाइचीप्रति मतदाताको विश्वास कायम रहेको र आगामी दिनमा आर्थिक तथा नीतिगत सुधारका निर्णय लिन सरकारलाई थप सहज हुने विश्लेषण गरिएको छ।

उता थाइल्याण्डमा प्रधानमन्त्री अनुतिन चार्नभिराकुल नेतृत्वको भुमजैथाई पार्टीले आम चुनावमा सबैभन्दा धेरै सिट जित्दै अग्रता बनाएको छ। ५ सय सदस्यीय प्रतिनिधि सभामा भुमजैथाईले करिब १९४ सिट जितेको प्रारम्भिक परिणामले देखाएको छ, जसले सरकार गठनका लागि गठबन्धन आवश्यक पर्ने संकेत दिएको छ।

विश्लेषकहरूका अनुसार अनुतिनले सीमा तनाव र राष्ट्रवादी एजेण्डालाई चुनावी रणनीतिका रूपमा प्रयोग गर्दै मतदाताको समर्थन बढाउन सफल भएका हुन्। यद्यपि एकल बहुमत नपुग्ने सम्भावना रहे पनि सरकार गठनका लागि आवश्यक समर्थन जुट्ने सम्भावना बलियो देखिएको बताइएको छ।

थाइल्याण्डमा चुनावसँगै २०१७ को सैनिक समर्थित संविधानलाई प्रतिस्थापन गर्ने विषयमा जनमतसंग्रह पनि गरिएको थियो। प्रारम्भिक नतिजाअनुसार नयाँ संविधान बनाउने प्रक्रियालाई बहुमत मतदाताले समर्थन गरेका छन्, जसले आगामी दिनमा संवैधानिक सुधारको बाटो खोल्न सक्ने अपेक्षा गरिएको छ।

समग्रमा, जापानमा ताकाइचीको बलियो जनादेशले नीतिगत निर्णयमा तीव्रता आउने संकेत गरेको छ भने थाइल्याण्डमा भुमजैथाईको अग्रताले लामो समयदेखि देखिएको राजनीतिक अस्थिरता घट्ने अपेक्षा बढाएको अन्तर्राष्ट्रिय विश्लेषणहरूमा उल्लेख गरिएको छ।