रूसको सैन्य निर्यातबाट १५ अर्ब डलर आम्दानी : पुटिन

एजेन्सी : रूसी राष्ट्रपति भ्लादिमिर पुटिनले विदेशीसँगको रूसको सैन्य–प्राविधिक सहयोग (एमटीसी) का उपलब्धि र आगामी प्राथमिकताबारे जानकारी दिनुभएको छ।

क्रेमलिन प्रेस सेवाका अनुसार सैन्य–प्राविधिक सहयोग आयोगको बैठकलाई सम्बोधन गर्दै राष्ट्रपति पुटिनले सन् २०२५ मा रूसको सैन्य–प्राविधिक सहयोग प्रणालीले उच्च प्रभावकारिता र लचिलोपन प्रदर्शन गरेको बताउनुभयो। उहाँका अनुसार सो अवधिमा विश्वका ३० भन्दा बढी देशहरूलाई सैन्य सामग्री आपूर्ति गरिएको छ भने त्यसबाट १५ अर्ब अमेरिकी डलरभन्दा बढी विदेशी मुद्रा आर्जन भएको छ।

उपलब्ध उपलब्धिहरूले रक्षा उद्योगका उद्यमहरूलाई आधुनिकीकरण गर्न, उत्पादन क्षमता विस्तार गर्न तथा भविष्यका वैज्ञानिक अनुसन्धानहरू अघि बढाउन अतिरिक्त कोष विनियोजन गर्न सहज भएको पनि उहाँले उल्लेख गर्नुभयो।

राष्ट्रपति पुटिनले सन् २०२६ मा रूसको सैन्य निर्यात थप बढ्ने अपेक्षा गरिएको बताउँदै स्वतन्त्र राज्यहरूको राष्ट्रमण्डल (सीआईएस), सामूहिक सुरक्षा सन्धि संगठन (सीएसटीओ) तथा अफ्रिकी देशहरू सैन्य–प्राविधिक सहयोगका प्राथमिक क्षेत्र रहने जानकारी दिनुभयो।

उहाँले विद्यमान वित्तीय तथा अन्य सहयोग संयन्त्रहरूको प्रभावकारी उपयोगलाई निरन्तरता दिनु अत्यन्त महत्वपूर्ण रहेकोमा जोड दिनुभयो।