निर्वाचन आचारसंहिता उल्लंघनमा कडा कारबाही गर्ने आयोगको चेतावनी

काठमाडाैं । निर्वाचन आयोगले निर्वाचन आचारसंहिता उल्लंघन गर्ने जो–कोहीलाई उजुरीका आधारमा मात्र होइन, आयोगको आफ्नै अध्ययन र अनुगमनबाट पनि कारबाही गर्ने चेतावनी दिएको छ।

आयोगका सूचना अधिकारी सुमन घिमिरे ले आयोगका संयन्त्रबाट प्राप्त प्रतिवेदन र उजुरीको अध्ययन गरी कानूनअनुसार कारबाही प्रक्रिया अघि बढाइने जानकारी दिनुभयो। उहाँका अनुसार आचारसंहिता निर्वाचनलाई स्वच्छ, निष्पक्ष, विश्वसनीय र भयमुक्त वातावरणमा सम्पन्न गर्न सरोकारवाला सबैको सहमतिमा जारी गरिएको हो।

आचारसंहिता पालना गराउने उद्देश्यले निर्वाचन क्षेत्र, जिल्ला र केन्द्रस्तर सम्म अनुगमन संयन्त्र सक्रिय बनाइएको छ। घिमिरेका अनुसार राजनीतिक दल, उम्मेदवार र मतदाता सबैले आचारसंहिता पालना गर्नुपर्ने हुन्छ। उम्मेदवारी मनोनयनका क्रममा मंगलबार केही आचारसंहिता विपरीतका गतिविधि देखिएको र ती विषय आयोगको नोटिसमा रहेको उहाँले बताउनुभयो।

“आयोगका संयन्त्रबाट आएका प्रतिवेदन र प्राप्त उजुरी दुवै आधारमा अध्ययन गरेर आवश्यक किसिमको कारबाही अघि बढाइन्छ,” उहाँले भन्नुभयो।

३ हजार ४८६ उम्मेदवारको मनोनयन दर्ता

प्रत्यक्षतर्फ हुने प्रतिनिधि सभा सदस्य निर्वाचनका लागि देशभर ३,४८६ जनाले उम्मेदवारी दर्ता गराएका छन्। तीमध्ये ३,०८९ पुरुष, ३९६ महिला र १ जना अन्य समूह बाट उम्मेदवार रहेका छन्।

राजनीतिक दल र उम्मेदवारहरूले देखाएको संयमता र शान्तिपूर्ण वातावरणका कारण मनोनयन प्रक्रिया सहज र शान्तिपूर्ण रूपमा सम्पन्न भएको आयोगले जनाएको छ। यसले फागुन २१ गते तोकिएकै मितिमा निर्वाचन हुनेमा आयोग विश्वस्त रहेको घिमिरेले बताउनुभयो।

आगामी कार्यतालिका

• बुधबार: उम्मेदवारविरुद्ध उजुरी दिने

• उजुरी छानबिनपछि अयोग्य ठहरिएका उम्मेदवारको नाम हटाइने

• माघ ९ गते: उम्मेदवारी फिर्ता लिने समय (१०:००–१:००)

• त्यसपछि अन्तिम उम्मेदवार सूची र निर्वाचन चिन्ह सार्वजनिक, मतपत्र छपाइ सुरु

प्रचारप्रसारको समय

• फागुन ३ देखि फागुन १८ गते रातिसम्म: औपचारिक चुनावी प्रचारप्रसार

• फागुन १८ गते रातिदेखि मौन अवधि लागू

• मौन अवधि अघि घरदैलो र मतदातासँग भेटघाट गर्न पाइने, तर जुलुस, ¥याली र आमसभा निषेध

उल्लेखनीय छ, आगामी फागुन २१ गते हुने निर्वाचनमा १६५ निर्वाचन क्षेत्रमा प्रत्यक्ष र ११० सिट समानुपातिक तर्फ मतदान हुनेछ।