देउवा समूहको रिटमाथि मंगलबार पेशी, कांग्रेसमा आधिकारिकताको विवाद सर्वोच्चमा

काठमाडौं । नेपाली कांग्रेसका निवर्तमान सभापति शेरबहादुर देउवा समूहले निर्वाचन आयोगको निर्णयविरुद्ध सर्वोच्च अदालतमा दायर गरेको रिटमा मंगलबारका लागि पेशी तोकिएको छ।

आयोगले गगन थापा समूहलाई पार्टीको आधिकारिकता दिएको निर्णयविरुद्ध देउवा समूहले आइतबार सर्वोच्च अदालतमा रिट दायर गरेको थियो। रिट दर्ता भएसँगै सर्वोच्च प्रशासनले सो रिटको पेशी मंगलबारका लागि तोकेको हो। उक्त रिट तत्कालीन कार्यवाहक सभापति पूर्णबहादुर खड्काले दर्ता गराउनुभएको हो।

देउवा समूहले रिटको पेशी आइतबारकै लागि तोक्न आग्रह गरे पनि सर्वोच्च प्रशासनले त्यस दिन सम्भव नभएको जानकारी दिएको थियो।

गगन थापा र विश्वप्रकाश शर्मा समूहले विशेष महाधिवेशन आह्वान गरी नयाँ कार्यसमिति चयन गरेपछि नेपाली कांग्रेसभित्र आधिकारिकताको विवाद चर्किएको हो।