बंगलादेशले २०२६ टी–२० विश्वकपमा भारत खेल्ने–नखेलेको निर्णय २१ जनवरीमा लिने

काठमाडौं । बंगलादेशले २०२६ को टी–२० विश्वकपमा सहभागी हुनेबारे, विशेषगरी भारतमा खेल्ने–नखेल्ने निर्णय जनवरी २१ सम्म लिनुपर्ने भएको छ। अन्तर्राष्ट्रिय क्रिकेट परिषद् (आईसीसी) ले बंगलादेश क्रिकेट बोर्ड (बीसीबी) लाई ढाकामा भएको बैठकमा समयसीमा जानकारी गराएको हो।

बीसीबीले विश्वकप खेल्न चाहेको भए पनि भारत बाहिर खेल्नुपर्ने अडान दोहोर्‍याएको छ। बोर्डले भारतमा खेल्दा सुरक्षाको चिन्ता रहेको जनाएको छ। तर श्रीलंका सह–आयोजक भएकाले वैकल्पिक स्थल हुन सक्ने बीसीबीको भनाइ छ। आईसीसीले भने तालिका परिवर्तन नहुने र बंगलादेशलाई समूह ‘सी’ मा राख्ने अडानमा रहेको स्पष्ट पारेको छ।

बंगलादेशको पहिलो खेल फेब्रुअरी ७ मा कोलकातामा वेस्ट इन्डिजविरुद्ध हुने तालिका तय छ। त्यसपछि दुई खेल पनि कोलकातामा हुनेछन् भने अन्तिम समूह खेल मुम्बईमा हुने तालिका छ।

आईसीसीले बंगलादेशलाई भारतमा कुनै विशेष सुरक्षा खतरा नरहेको आश्वासन दिएको छ। स्वतन्त्र सुरक्षा एजेन्सीको रिपोर्टअनुसार भारतमा समग्र खतरा स्तर मध्यमदेखि उच्च भए पनि कुनै टोलीमाथि प्रत्यक्ष खतरा देखिएको छैन।

यदि बीसीबीले भारतमा खेल्न अस्वीकार गरे, आईसीसीले बंगलादेशको स्थानमा स्कटल्यान्डलाई विश्वकपमा सहभागी गराउन सक्ने बताएको छ। स्कटल्यान्डले यूरोप छनोट पार गर्न नसके पनि विश्वकपमा खेल्ने मौका पाउनेछ।

बीसीबी र भारतबीच विवाद आईपीएल टोली कोलकाता नाइट राइडर्सले बंगलादेशी खेलाडी मुस्ताफिजुर रहमानलाई हटाएपछि सुरु भएको थियो। त्यसपछि बंगलादेश सरकारले आईपीएल प्रसारणमा प्रतिबन्ध लगाएको थियो, र बीसीबीले भारतमा विश्वकप नखेल्ने पत्र आईसीसीलाई पठाएको थियो।