निर्वाचन आचारसंहिता आज राति १२ बजेदेखि लागू

काठमाडौं । निर्वाचन आयोगले आज राति १२ बजेदेखि निर्वाचन आचारसंहिता लागू गर्ने भएको छ।

कार्यवाहक प्रमुख निर्वाचन आयुक्त रामप्रसाद भण्डारीको नेतृत्वमा रहेको आयोगको टोलीले आज प्रधानमन्त्री सुशीला कार्कीलाई भेटेर मतदानको मितिभन्दा ४५ दिन अघि आचारसंहिता लागू गर्ने प्रचलनअनुसार आज रातिदेखि आचारसंहिता लागू हुने जानकारी दिएको हो।

आयोगका तर्फबाट प्रधानमन्त्री तथा मन्त्रीहरूलाई निर्वाचन आचारसंहितासम्बन्धी विशेष प्रस्तुतीकरण पनि गरिएको थियो। सो अवसरमा प्रधानमन्त्री कार्की, मन्त्रिपरिषद्का सदस्यहरू, नेपाल सरकारका मुख्य सचिव तथा गृह मन्त्रालयका अधिकारीहरूको उपस्थिति रहेको थियो।

यसअघि आयोगको आज दिउँसो बसेको बैठकले निर्वाचन आचारसंहिता राति १२ बजेदेखि लागू गर्ने निर्णय गरेको थियो।