निष्पक्ष छानबिनका लागि गृहमन्त्रीले नैतिकताका आधारमा राजीनामा दिनुपर्छः सांसद बेलबासे

काठमाडाैं । राष्ट्रिय सभा सांसद गंगाकुमारी बेलबासेले निष्पक्ष छानबिनका लागि गृहमन्त्री रमेश लेखकले नैतिकताका आधारमा राजीनामा दिनुपर्ने बताउनुभएको छ । 

मंगलबार राष्ट्रियसभाको आकस्मिक समयमा बोल्दै सांसद बेलबासेले गृहमन्त्री लेखक बौद्धिक, सालिन र कानून बुझेको व्यक्ति भएकाले राजीनामा दिएर मार्ग प्रशस्त गर्न माग गर्नुभयो । 

उहाँले भिजिट भिसा प्रकरणमा अध्यागमन कार्यालय प्रमुख सहसचिव तीर्थराज भट्टराईलाई आम नागरिकबाट पठाएर दैनिक पचास लाखभन्दा बढी असुलेको, छानविनमा तानिनु एकदिन अघि मन्त्रालय फिर्ता बोलाउनु, अख्तियारको अनुसन्धानलाई प्रभाव पार्नेगरि सरुवा गर्नुलगायतका कारण गृहमन्त्रीले भ्रष्टाचारीलाई पक्षपोषण गरिरहेको आरोप लगाउनु भयो । 

उहाँले गृहमन्त्रीले विगतमा पनि आरोप लागेपछि नैतिकताका आधारमा राजीनामा दिनुपर्छ भन्ने गर्नुभएका कारण अहिले आफैंमाथि लागेको आरोपको छानविनका लागि मार्ग प्रशस्त गर्न माग गर्नुभयो ।

उहाँले त्रिभूवन विमानस्थलमा भिजिट भिसामा देखिएका घटनाक्रमले चलखेल र सेटिङ छ भन्ने प्रश्न टड्कारोरुपमा देखिएकाले गृहमन्त्रीले राजीनामा दिनुपर्नेमा जोड दिनुभयो ।