काठमाडौं । विभागीय टोली त्रिभुवन आर्मी क्लबले एन्फा महिला लिगमा विजयी सुरुवात गरेको छ ।
बुधबार सातदोबाटोस्थित एन्फा कम्प्लेक्समा संकटा फुटबल क्लबलाई ४–० ले पराजित गर्दै आर्मीले बिजयी सुरुवात गरेको हो । खेलको १९ औं मिनेटमा आर्मीले सावित्रीदेबी मगरको गोलमार्फत सुरुवाती अग्रता लियो ।
त्यस्तै खेलको ६१ औं मिनेटमा विमला चौधरीले आर्मीका लागि गोल थपिन् भने खेलको ७१ औं मिनेटमा आर्मीका लागि विमलाले अर्को गोल गरिन् । त्यस्तै खेलको ७६ औं मिनेटमा अनिता लम्जेलले गोल गर्दै आर्मीलाई ४–० को जीत दिलाइन् ।
जीतसँगै आर्मीले तीन अंक बटुलेको छ । एन्फाको आयोजनामा जारी लिगमा १० टिमको सहभागिता रहेको छ । प्रतियोगिताका विजेतालाई १० लाख र उपविजेतालाई ५ लाख नगद पुरस्कार प्रदान गरिने एन्फाले जनाएको छ ।